३ हजारबाट शुरु गरेको व्यवसाय अहिले ३ करोड पुग्यो-मुद्रण व्यवसायी श्रेष्ठ

५ श्रावण, २०७८

५ साउन, पोखरा ।
प्रतिक अफसेट प्रेस महेन्द्रपुलका संचालक पदमलाल श्रेष्ठले आज भन्दा २२ वर्ष अगाडी तीन हजार रुपैंयामा संचालन गरेको व्यवसायको पुजीं अहिले ३ करोड पुगेको बताउनुभयो । श्रेष्ठले गोर्खाली रेडियोका स्टेशन म्यानेजर खिमा गुरुङसंगको रेडियो अन्तर्वातामा विगतका क्षण स्मरण गर्दै उक्त कुरा बताउनुभएको हो ।

उहाँ यो सफलता प्राप्त गर्नुको श्रेय ग्राहक वर्गलाई दिनुहुन्छ । यस्तै प्रतिक अफसेट प्रेस यो अवस्थामा आईपुग्नुमा उद्योगमा कार्यरत कर्मचारी, घरपरिवार, आफन्तको साथ र सहयोग महत्वपूर्ण रहेको उहाँको भनाई छ । श्रेष्ठ कर्मचारी विना सफलता प्राप्त गर्न नसक्ने भएकाले पहिलो प्राथमिकता कर्मचारीको चुलो बाल्नुपर्छ भन्ने मान्यता राख्नुहुन्छ ।

यस्तै कर्मचारी प्रतिको माया, विश्वास र उत्तदायित्व वोधले नै प्रतिक अफसेट प्रेसले सवैको विश्वास प्राप्त गरेको हो । जीवनमा सफलता प्राप्त गर्न इच्छाशक्ति र दुरदर्शिता हुन जरुरी रहेको श्रेष्ठ बताउनुहुन्छ ।

उहाँ हाल मुद्रण उद्योग संघका निवर्तमान अध्यक्ष, लायन्स क्लव अफ पोखरा डल्फिनका अध्यक्षमा रहि सामाजिक योगदान र उत्तरदायित्व वहन गर्दै आफ्नो कर्मलाई अगाडी बढाई रहनुभएको छ ।

श्रेष्ठ अहिले पनि बेला बेलामा पहिलेको अवस्था र अहिलेको अवस्थालाई तुलना गर्दा आफ्ना आँखाबाट खुशीका आँशु रसाउने बताउनुहुन्छ ।